Бүгүҥҥү “Күлүккэ” биоэнергетик Николай Иннокентьевич Слепцов-Сылык бэчээккэ тахсыбыт “Чараас эйгэ кистэлэҥэ” кинигэтиттэн бэрт дьикти түгэннэри билиһиннэриэм.    Кинигэҕэ бу курдук, дьиҥ олоххо буолан ааспыт 62 холобур  уонна кини ураты өҥөтүнэн туһаммыт махталлаах дьон ахтыылара баар. Ол иһигэр, Айыына иккис үөртэн хайдах эмтэнэн үтүөрбүтүн эмиэ бу кинигэттэн билсэр кыахтааххыт.       Ытык тиит дьайыыта (14-с холобур)      Ытык тиити аахайбат буолуу сэтин-сэлээнин туһунан холобур. Бу саҥа үйэ онус сылларын саҕана, хотугу улуустарынан таһаҕас таһыынан дьарыктанар биир уол төбөтүтэн ыалдьыбытын миэхэ, Чурапчыга үлэлии сырыттахпына, Бороҕонтон аҕаллылар.    Уолу аатын уларытан Болуодьа диэн ааттыым. Кини көмөлөһөөччүтүнүүн дойдуларыгар төннөн иһэн, биир Ытык тииккэ тохтообокко ааһа турбуттар. Ааспыт сырыыга хоту баралларыгар тохтообокко ааспыттар эбит уонна төннөллөрүгэр эмиэ аахайбатахтар. Сотору буолаат, Болуодьа иэнэ кэдэҥнээбит, көлөһүнэ сар түспүт, түөһүн иһигэр туох эрэ куттал олохсуйан илибирии-салыбырыы түспүт. Ол иһин массыынатын уруулун көмөлөһөөччүтүгэр биэрбит. Көмөлөһөөччүтэ айаннаан иһэн көрдөҕүнэ, киһитэ илибирээн-салыбыраан кумуччу туттан, туохтан эрэ куттаммыт харахтарынан сүр үлүгэрдик көрүтэлээн эргичиҥнии олорбут. Уол массыынатын тохтотон туох буолбутун ыйыталаһа сатаабыт да, Болуодьа хоруйдаабакка өрө бабыгырыы олорбут. Кини кутталыттан кабина иһиттэн тахсыбат, утуйбат, аһаабат, бэйэтигэр тиийинэ сатыыр буолбут. Онтон ыла иэдээннээх айаны айаннаан эрэй бөҕөнү көрөн, киһитин кэлгийэн көмөлөһөөччүтэ Болуодьаны нэһиилэ дойдутун булларбыт. Дьиэтигэр аймахтара хас да хонук, миигин булуохтарыгар диэри, Болуодьаны хоско хаайан олорон, бэйэтигэр тиийиниэ диэн уочаратынан манаан хоммуттар. Миэхэ аҕалбыттарыгар көрбүтүм, Болуодьа биополетыгар Ытык тиит иччитин дьайыыта олохсуйбут. Чаас курдук ыраастаан, кутун-сүрүн оҥорорбун кытта киһим тута үчүгэй буолан хаалла –кэпсэтэн-ипсэтэн, күлэн-үөрэн дойдутугар барда. Болуодьа билигин даҕаны ыраах хоту улуустарга таһаҕас тиэйиитигэр үлэлиир уонна сир-дойду, Ытык тииттэр иччилэригэр бэлэх уунан, ас кээһэн сиэр-туом толоро сылдьар. Билигин барыта этэҥҥэ.   “Хоруобуҥ бэлэм” ... (19-с холобур)      Кулун тутар ый бүтүүтүгэр 13 саастаах Айыына диэн (аатын уларыттым – С.) кыысчааны Бүлүү эҥээр улуус биир түгэх бөһүөлэгиттэн Дьокуускайга аҕалан, миэхэ көрдөрдүлэр.    Икки сыллааҕыта үөрэх дьыла бүтэн, кини кылааһын оҕолоро походтаан айылҕаҕа тахсыбыттар. Биир көҥдөйдөөх улахан тиит таһыгар тохтоон оонньообуттар-көрүлээбиттэр, хаартыскаҕа түспүттэр. Оттон Айыына көҥдөйү өҥөйөн көрбүтэ, торуоскалаах эмээхсин олорор эбит. Ону көрөөт, кыайан хаһыытаабат даҕаны, хамсаабат да турукка киирэн хаалбыт. Эмээхсин үөрэ түспүт: “Чээн, мин кыыһым курдук кыыс кэллэ. Хата, мантан ыла эн биһиги, аны, хаһан да арахсыахпыт суоҕа – өрүү бииргэ буолуохпут. Мин туспунан кимиэхэ даҕаны кэпсээмэ”, – диэбит уонна кыыска киирэн хаалбыт. Оннук турдаҕына, учуутала уонна оҕолор кинини хаһыытаан-ыһыытаан ыҥырбыттарыгар биирдэ бэттэх кэлбит. Ити туһунан кыысчаан кимиэхэ да кэпсээбэтэх. Кэнники иккитэ түһээн баттаппыт. Эмээхсинэ кэлэн: “Үһүстээн кэлиибэр эйигин илдьэ барыам”, – диэбит.    Кулун тутар ый иккис аҥаарыгар биир күн Айыына сууллан түспүт да таттаран киирэн барбыт. Тииһигэ ааспыт гынан баран, уутугар аҥаарыйа сылдьар курдук буолбут. Ол быыһыгар: “Төрөппүттэргин хоско киллэртээмэ, бары таҕыстыннар, мин эйигин илдьэ барыам, хоруобуҥ бэлэм”, – диэн эмээхсин саҥатынан саҥарар буолбут, дьонун сүрэҕин хайыппыт. Улуус киинин балыыһатыгар хас да күн сытыаран баран, Дьокуускайга Мэдиссиинэ киинигэр ыыппыттар. Бээтинсэ күн куоракка кэлэн аймахтарыгар түспүттэр.    Өрөбүл күҥҥэ миигин ыҥырдылар. Мин тиийбиппэр, Айыына ороҥҥо сытан эрэ уунаҥныыр, тардыалаһар, ким эрэ соһон, оронтон сууллуох курдук буоллаҕына, аҕата көтөҕөн ылан орон улаҕатыгар сыҕарытар. Онтон бэйэтэ орон кытыытыгар сытынан кэбистэ, кыыс дэлби түспэтин диэн. Кыысчаан ол сытан эмиэ эмээхсин тылларынан: “Дьоҥҥун хоско киллэримэ, түннүгүнэн ыстан, хоруобуҥ аллара бэлэм турар”, – диэн саҥара сытар.    Аттынааҕы олоппоско олордон баран, дьонун хостон таһаартаатым уонна ыраастаары оҥоһуннум. Кыысчаан уунаҥнаан иһэн тохтоон хаалла уонна сүүрбэччэ мүнүүтэ эмээхсин тылынан уонна кини куолаһыгар маарыннатан саҥарар: “Мин тайҕаҕа төрөөбүтүм-үөскээбитим, холкуос үлэтигэр умса-төннө түһэн үлэлээн-хамсаан сордоммут киһибин. Мин аатым Антонина Алексеевна диэн этэ (бэйэтэ ааттаммытынан киллэрдим – С.) Оҕо сылдьан бу мас таһыгар оонньуур этибит. Арай ыарыыга ылларбытым. Сор-муҥ бөҕөнү көрбүтүм. Оччолорго араҥ ыарыы тарҕаммыта...”, – диэн олох даҕаны сэрии саҕанааҕы кэми кэпсээн барда.    Бу дьахтар икки кыыстаах, икки уоллаах эбит. Кэпсээниттэн иһиттэххэ, кини, дьиҥинэн, эдэр дьахтар эбит. Тоҕо диэтэххэ, тылын тамаҕыттан өйдөөтөххө, улахан оҕолоро саҥа уоннарын ааһан эрэр эбиттэр. Онон сабаҕалаатахха, саамай улааттаҕына, түөрт уончалаах дьахтар эбит. Кэргэнин туһунан тугу да кэпсээбэтэ – эрдэ өлбүт дуу, эбэтэр сэрии бириэмэтэ буолан, сэриилэһэ сылдьара дуу. Оҕолорунуун бары ыалдьыбыттар. Холкуоһун дьоно кинилэр алаастарын ырааҕынан тумна сылдьар буолбуттар. Аччыктаан, хоргуйан, ыалдьан эрэй бөҕөнү көрөн, сордонон-муҥнанан баран бу дьахтар оҕолорун өлөртөөбүт. Кими хайдах өлөрбүтүн барытын кэпсээтэ. “Оттон ол тииккэ тиийэн өлбүтүм – бу орто дойдуттан суох буолбутум (бэйэбэр тиийиммитим диэбэт – С.) Син биир мин бэйэбин баарбын дэнэбин...” –  диэн салгыы кэпсиир. Ол өлүөҕүттэн бу оҕолору көрсүөр диэри тугу гыммытын кэпсээбэтэ. Арааһа утуйан хаалбыт быһыылаах, ону бу оҕолор оонньоон-көрүлээн, ыһыытаан-хаһыытаан, сарылаһан-часкыһан уһугуннаран кэбиспиттэр быһыылаах. Оҕо бөҕө кэлэн, кинилэр урут оҕо сылдьан оонньообуттарын курдук, оонньообутун-көрүлээбитин, хаартыскаҕа түспүтүн туораттан көрөн олорбут. “Онтон бу кыыс маһым иһигэр киирэн кэллэ, иннибэр олордо (өҥөйдө диэбэт – С.)... Мин иһигэр киирэн хааллым... биһиги аны хаһан да арахсыбаппыт, өрүү бииргэ буолуохпут... эрдэ да ылыам, кини хоруоба бэлэм турар... ити тиит үрдүгэр иккиэн олорор буолуохпут... миигин кыайан ыраастаабаккын... мин бэйэм ойууммун (удаҕаммын дэммэт – С.) ... эн сэниэҥ эстэн өлүөҥ, ыраастаама!.. ыраастаама!.., ыраастаама!” (Уһун баҕайытык кэлиилии кэбэ олордо... “Ыраастыыр буоллаххына, эн оҕолоргор тиийиэм!...”, – диэн саҥара, миигин куттуу олордо. Онон дьахтар үөрэ бу кыысчааны бэйэтигэр тиийиннэрэн баран үөрүн доҕор оҥостоору гынар эбит. Дьахтар үөрүн кыыстан таһааран, аллараа дойдуга ыытарбар кыыска “улааттаххына кэлиэм” диэн баран, сүтэн хаалла. Онтон ыла биллибэтэ.    Үһүс күн бииргэ алтыһар көрбүөччүбүн В.А. Черкашинаны-Күндүүнэни аҕалан чинчийтэрдим. Кини бу эмээхсин буолбакка, эдэрчи көрүҥнээх, саҥа сааһыран эрэр дьахтар эбит диэн уонна кини үөрэ кэлбэттии барбытын быһаарда. Онон, эдэр дьахтар ыалдьа сылдьар уонна торуоскалаах буолан, оҕо көрүүтүгэр эмээхсин буолан көстөр эбит. Валентина Афанасьевна кыысчааҥҥа, төрөппүттэргэ уйулҕаларын уоскутан көмөлөстө, сүбэ-ама биэрдэ.    Нэдиэлэни быһа Мэдиссиинэ киинигэр Айыынаны чинчийдилэр да, тугу да быһаарбатылар – барыта үчүгэй. Уһугар тиийэн психиатрическай балыыһаҕа чинчийиини барарыгар эттилэр, мин ыыппатым. Онно син биир тугу да кыайан быһаарыахтара суоҕа уонна сымыйанан ханнык эрэ куһаҕан  диагноһы туруоруохтара – оҕо олоҕун буортулуохтара.    Айыына сүүрбэччэ мүнүүтэ кэпсээбититтэн уон биэс мүнүүтэ курдугун диктофоҥҥа устан ылбытым.    Бу кыысчаан дьахтар аатын Антонина Алексеевна диэтэ да, мин ону саарбаҕалыыбын. Оннооҕор биһи оҕо эрдэхпитинэ улахан киһини аҕатын аатынан ааттыылларын өйдөөбөппүн. Оскуолаҕа учууталлары эрэ ааттыыллара эбитэ буолуо. Арааһа,  Айыына илэ өйө булкуһан, оҕо улахан дьону аҕаларын аатынан ааттыырга үөрэммит буолан, араспаанньатын аҕатын аатыгар уларытта быһыылаах.    Бу холобурга көстөрүнэн, өлбүт киһи энергоинформационнай харамайа (үөр) өлбөккө-сүппэккэ, тиит көҥдөйүгэр олохсуйбут. Бу орто дойдуга араҥ ыарыынан ыалдьыбыт, оҕолорун өлөрбүт дьахтар бэйэтигэр тиийинэн, үөр буолбут. Оҕолор кэлэн, оонньоон-көрүлээн, айдааран бу дьахтар үөрүн уһугуннарбыттар. Оҕолор биоэнергияларын иҥэринэн, уһуктан “сэргэхсийэн” дьахтар үөрэ Айыына иһигэр киирбит. Онон былыргы кырдьаҕастар сиргэ-дойдуга киһи бэйэ бодотун тардына сылдьыахтаах, мээнэ айдааран, ыһыытаан-хаһыытаан сир иччитин, абааһытын көбүтүөххэ сөп диэн этэллэрэ олохтооҕо мантан көстөр.    Бу тиит аһаҕас сиргэ турара саарбаҕа суох. Өбүгэлэрбит тиит көҥдөйүн аллараа дойдуттан абааһылар тахсаллар диэн, бүөлүү мас саайан кэбиһэллэрэ эмиэ олохтооҕо көстөр.    Бу дьахтар үөрэ кыыска киирэн баран, кини өйүн бэйэтин ис өйүнэн хам тутан илэ өйүгэр ыыппат – “зомби” оҥорон бэйэтин тылынан саҥарда уонна хамаандалыы сылдьыбыт. Оннук хамаандалаан хаһан баҕарар Айыынаны бэйэтигэр тиийиннэрэр кыахтаах: “Эрдэ да ылыам, хоруоба бэлэм турар...”, – дэттэрэр.    Кыыһы ыраастаан, бу дьахтар үөрүн ис өйүн кыыс ис өйүттэн араарарбын кытта, кини илэ өйүгэр төннөн кэллэ – утуйа сытан уһуктубут курдук буолла. Биллэн турар, кини тугу кэпсээбитин өйдөөбөт.    Ити дьахтар үөрэ орто дойдутааҕы майгытын-сигилитин, куһаҕан санаатын илдьэ сылдьар, урукку олоҕун өйдүүр, кэпсиир, толкуйдуур дьоҕурдаах уонна тулалыыр эйгэни түһүүр курдук билэ-көрө сылдьар. Ол иһин, бу дьахтар үөрэ бэйэтин “баарбынан ааҕынабын” дэнэр. Ол эбэтэр, бу үөр ис өйүн илдьэ сылдьар, энергоинформационнай эйгэ энергоинформационнай харамайа буолар.    Үөһээ духуобунай таһымнарга тахсыбыт энергоинформационнай олохтор эмиэ итинник дьоҕурдарын илдьэ, түһүүр курдук үөрүү-көтүү, эйфория туругар сылдьаллар. Өбүгэлэрбит чугас дьоннорун, сыдьааннарын көрө-истэ, араҥаччылыы-арчылыы сылдьаллар диэн өбүгэлэрбит өйдөбүллэрэ сөптөөҕө көстөр.    Айыынаҕа киирбит үөр энергоинформационнай бөлөнөх буоларын быһыытынан, араҥ ыарыы энергиятын, информациятын эмиэ илдьэ сылдьар. Онон киниэхэ уйулҕатыгар эрэ дьайар буолбакка, өссө араҥ ыарыыны көбүтүөн сөп. Өбүгэлэрбит мэнэриктэргэ иччилэр, абааһылар, үөрдэн киирэннэр этиттэрэллэр дииллэрэ, бу холобурга көстөрүнэн, эмиэ олохтоох эбит. Ол аата, мэнэриктэр диэн, аныгылыы тылынан эттэххэ, контактердар буолаллар. Бу кыысчааҥҥа эмээхсин үөрэ киирэн кининэн мэнэритэр курдук саҥардан этиттэрдэ.    Айыынаҕа бу үөр тоҕо киирдэ диэн ыйытыы үөскүүр. Үөһэ эппитим курдук, бастатан туран, үөрдэр, абааһылар улахан аньыылаах-харалаах, аһары кирдээх, ыһыллыбыт-тоҕуллубут биополелаах дьоҥҥо сысталлар.    Иккиһинэн, аһары күүстээх үрдүк тэтимнээх сырайыылаах биополелаах дьоҥҥо абааһылар сыстан, кинилэри сиэн-эттэтэн ураты оҥоһуулаах-туруктаах, ураты уйулҕалаах киһи – ойуун, удаҕан диэн оҥорон таһаараллар.    Айыына былыргынан эбитэ буоллар, эттэнэн удаҕан буолуохтаах этэ. Кини биополета аһары күүстээх. Кини саастыыта оҕолор биополеларын халыҥа үксүн 1.5 миэтэрэттэн ордооччута суох. Оттон Айыына киэнэ – 5,5 м! Ол эбэтэр улахан дьон киэнинээҕэр 2-2,5 төгүл улахан!    Онон кини удаҕан буолаары эттэтэр кутталлаах диирбитигэр тиийэбит. Аны эттэтэн барда да, психдиспансерга киирэр. Оччоҕо үтүөрбэт даҕаны, удаҕан да буолбат. Үйэтин тухары онтон таһаарбакка “эмтииллэр”. Эппиппит курдук, психиатрия материалистическай көрүүгэ-истиигэ тирэҕирэр буолан, муҥур уһукка тиийэн баран сылдьар. Абааһыны сүгэ сылдьар дьону ыраастаабакка эрэ оннук “эмтээн” хайдах да үтүөрдүбэккин. Онон Айыынаны көрө-истэ, арчылыы-араҥаччылыы сылдьабын. Ол саас, икки ый курдугунан, Айыынаҕа биир үөр иккистээн киирэ сырытта...   ЛОҺУУРА.
kyym.ru сайтан